Qeqqata Kommunia piffissap ilaani Pinaveersaartitsisussamik, piffissallu ilaani Allaffimmi ikiortissamik pissarsiorpoq. Taamaalilluni atorfik piffissaq tamakkerlugu atorfiussaaq.
Pinaveersaartitsinermi allaffissornermilu akimortumik ataqatigiissitamillu suliniuteqarnissamik sulisup qulakkeerinninnissaa kissaatigaarput.
Suliassat akisussaaffiillu:
- Nunaqarfimmi akimortumik pinaveersaartitsiniarnermut ataqatigiissaarineq
- Nunaqarfimmi pinaveersaartitsilluni sammisassaqartitsiniarnissamut pilersaarusiortarnermiluakisussaaqataaneq
- Isumalluutinik pigisanillu ataqatigiissaarinq
- Pinaveersaartitsiniutinik tigussaasunik aallarnisaaneq
- Atuarfimmi Meeqqerivimmilu tigussaasunik paasisitsiniaanermut suliaqarneq
- Pinaveersaartitsilluni sammisaqartitsinermut tunngatillugu peqatigiiffinnik suleqateqarneq
- Inuit allattorsimaffiannik atatillugu suliassat
- Ineqarnermut tapiissutinik qinnuteqaatit
- Meeqqat tapiinik suliaqarneq
- Erninermut atatillugu ullormusiat
- Meeqqanut akilersuutissanik qinnuteqaatit
- Meeqqerivinnut allatsinnerit
- Eqqagassalerinermi sullinneqarnermut ilanngutsinniat / unititsiniallu
- Kommunip karsia
- Suliassat takkussuuttut nalinginnaasut
Piginnaasassat:
- Suleqateqarluarsinnaasutit avatangiisinnillu sunniisinnaassuseqassasutit
- Allaffissornerup pinaveersaartitsinerullu iluini misilittagaqarlutit
- Akimortumik ataqatigiissaarisinnaasuusutit
- Kulturimi marloqiusaasumik avatangiisilimmi anguniagaqartumik sulisinnaassuseqartutit
- Ajornanngippat arlalinnik oqaaseqartuussasutit, kalaallisut qallunaatullu.
Akissarsiat atorfininnermilu atugassarititaasut:
Akissarsiat atorfeqartitaanermilu atugassarititaasut, Namminersorlutik Oqartussat kattufigisallu isumaqatigiinniarsinnaatitaasup akornanni isumaqatigiissutit atuuttut naapertorlugit pissapput.
Pinaveersaartitsisutut / allaffimmiutut atorfik Sarfannguani kommunip allaffiani atorfiuvoq, aaqqissuussaanikkullu aqutsisup ataani inissisimalluni.
Piaartumik isumaqatigiissuteqarnikkulluunniit atorfinititsisoqassaaq.
Atorfik pillugu annertunerusumik paasissutissat Nunaqarfinni Ataqatigiissaarisumut Louisannguaq Rosingimut loro@qeqqata.gl imaluunniit Pisortaanerup sulisuinut pisortamut Mette B. Berthelsenimut mbbe@qeqqata.gl saaffiginnissuteqarnikkut paasiniarneqarsinnaapput.
Qinnuteqaat ilinniarsimanermut uppernarsaatinik, imminut ilisaritinnermik oqaaseqaatinik attaveqarfissamillu ilalik nassiunneqassaaq.
Paasissutissat nunaqarfilerisumut Louisannguaq Rosing e-mail: loro@qeqqata.gl
Oqarasuaat 81 78 33 paasiniarneqarsinnaapput
Nunaqarfik Sarfannguit avataangiisaalu:
Sarfannguit nunaqarfiuvoq 130-it akornanni inulik, tunngavilerneqarsimasoq ukioq 1843-mi, inuutissarsiutit pingaarnersaraat aalisarneq, Sarfannguit kangerluup Amerlup qinnguaniippoq Sisimiuniit 41 km. missaani ilorpasinnerusoq, nunataalu tuttoqarfiuvoq / umimmaqarfiuvoq allanillu uumasunik peqarfiulluni, soorlu arferit aasami alutorineqartaqisut takkusimaalerneranni.
Qeqqata Kommuniani kisiartaalluni Nunarsuarmioqatigiinnut kingornussassat iluanniippoq – UNESCO aqqutigalugu pilersinneqarsimasoq. Tamannalu isumaqarpoq pinngortitamik eriagineqartussamik pilersitaasimasoq, taamaattumik takornarissanik kajumerineqartarpoq ornissallugu.
Nunaqarfimmiullu pingaartitaraat pitsaasumik kusanartumillu tikeraanut inussiarnersumillu tikilluaqqusinissaq, taamatullu nunaqarfimmi anguniakkat pingaarnersaraat Kalaalit Nunaanni qimmeqarfinni saligaannerpaanngornissaq.
Pinngortitarsuaq alianaatsoq aammali ilaanni allatulli peqqarniisinnaasartoq qanimut misigisaqarfigiuk innuttaasut peqatigalugit, sorpassuarnik pilersitseqataagit kikkulluunniit nunarsuarmioqatigut misigisaqartikkusuppagut nuannersumik.
Qeqqata Kommunia ineriartortuartuuvoq aamma nunaqarfinni peqataagit kommunimilu sulisunik allanik naapitaqarit.
Qinnuteqarnissamut killissarititaasoq: novembarip 26.-at, 2025