Pisortaanerup sulisuini Suliniutinut siunnersortitut paarlatsitut atorfik, Qeqqata Kommuniata aamma Kalaallit Nunaanni Timersoqatigiit Kattuffiata akornanni takorluukkatut isumaqatigiissummik ingerlatsinermut kivitseqataanermullu akisussaassuseqarluni pissanganartoq sulisussarsiuunneqarpoq.
QK-p GIF-illu akornanni ataatsimoorussamik takorluukkatut isumaqatigiissummi suliniutit allassimasut atuutilersinnerisa ataqatigiissaarnerisalu ingerlatsinikkut isumannaatsumik naapertuuttumillu ingerlanissaannik qulakkeerissaatit, tamatumalu saniatigut aaqqissuusaasumik pilersaarusiornermik ingerlatsinermik saqqummiussassaliornissarlu suliassarissavatit.
Taamatullu takorluukkatut isumaqatigiissut naapertorlugu immikkoortumi suliniutinik siumut sammisunik nutaanik ilanngussinerit.
Taamatullu akimortumik sulinermik aammalu aqutsisoqatigiinnut attaveqarnermik qulakkeerissallutit.
Atorfik ukiumik ataatsimik sivisussusiligaalluni paarlatsitut killilimmik piffissaligaavoq, kinaassusersiunngitsumillu tunngavissaqartillugu sivitsorneqarnissaanut periarfissaqarluni.
Suliassat akisussaaffiillu:
- Kommunimi allaffissornermi politikkikkullu ingerlatsinermut tunngatillugu peqqinnermut siuarsaataasunik suliallu akimorlugit suliniutinut suliatigut siunnersiueqatigiinneq akisussaaffigissavat.
- Piffissaagallartillugu ataatsimiititaliap imaluunniit kommunalbestyrelsip kiisalu aqutsisooqatigiit ataatsimiinnissaannut peqqinnermut suliniutit pillugit oqaluuserisassat suliarineqarsimanissaat kiisalu tassunga atatillugu aalajangiinissamut toqqammavissaasunik aningaasaqarnikkut, inatsisitigut teknikkikkullu paasinarluartumik nassuiarneqarsimanissaat qulakkiissavat.
- Aqutsisoqatigiinnut- aamma sulisoqatigiinnut QK aamma GIF-imit pilersinneqarsimasunut peqataaneq.
- Peqqinnerup pinaveersaartitsinerullu iluani suliniutaasunut suliassatut saqqummiussassanik suliaqarneq
- Ilaqutariinnerup peqqinnerullu iluani suliassanik tigussaasunik paasiniaaneq misissuinerlu
- Pitsaaliuinermi siunnersortinik suleqateqarluni pikkorissarnernik, workshoppinik, sammisaqarluni ulloqartitsinernik suliniutinillu pinaveersaataasunik ataqatigiissaarineq.
- Illup iluani avataanilu paasissutissanik atugassanik katersineq
- Pisortaanerup sulisui suleqatigalugit suliassanik allanik suliaqarneq
Piginnaasat:
- Ilinniagartuutut attuumassutilimmik ilinniagartuusutit allamilluunniit attuumassuteqartumik ingerlaqqiffiusumik ilinniagaqartutit aamma Kalaallit Nunaanni inuiaqatigiinni pissutsinut ilisimasaqartutit
- Pitsaasumik oqalunnikkut allannikkullu attaveqallaqqissuusutit
- Akimortumik suleqateqallaqqissuusutit avatangiisinillu sunniisinnaassuseqartutit
- Suliniutinik aqutsinerup iluani misilittagaqarneq aamma Kalaallit Nunaanni peqqinnermut, timersornermut isumaginninnermullu pissutsinik misilittagaqarneq
- Aaqqissuussaanermi politikkikkut aqutaasumi suliat suliarineqartarnerinik pitsaasumik ilisimasaqarneq
- Tamanik takunnillaqqissuseqarluni suliassanik aallartitsisinnaaneq, iliuuseqallaqqissuuneq, sungiussiasuunerlu
- Marluinnik kultureqarluni avatangiisilimmi anguniagalimmik sulisinnaassuseqartutit
- Arlalinnik oqaaseqartuusutit, kalaallisut, qallunaatut tuluttullu.
Akissarsiat atorfeqartitaanermilu atugassarititaasut:
Akissarsiat atorfeqartitaanermilu atugassarititaasut, taakkununnga akiliunneqarluni angalanermut pequtillu assartorneqarnissaannut pisinnaatitaaffiit ilanngullugit, Naalakkersuisut kattuffigisallu isumaqatiginninniarsinnaatitaasup akornanni isumaqatigiissutit atuuttut naapertorlugit pissapput.
Malittarisassat sukkulluunniit atuuttut malillugit akilerneqartussamik inissamik innersuussisoqarsinnaavoq.
Atorfik allaffissornikkut Sisimiuni inissisimavoq, Sisimiunilu Pisortaanerup sulisuinut pisortap aamma Nuummi Kalaallit Nunaanni Timersoqatigiit Kattuffiata Pisortaata ataani aaqqissuussaanikkut inissisimalluni.
Piaartumik isumaqatigiissuteqarnikkulluunniit atorfinittoqassaaq.
Paasissutissat sukumiinerusut Sisimiuni Pisortaanerup sulisuinut pisortamut, Mette B. Berthelsen, oqarasuaat (+299) 86 73 02-mut, e-mail: mbbe@qeqqata.gl imaluunniit Kalaallit Nunaanni Timersoqatigiiffiit Kattuffia Nuummi pisortaanut Jonas Jensen-imut, e-mail: jonas@gif.gl saaffiginninnikkut pissarsiarineqarsinnaapput
Qinnuteqaat:
Qinnuteqaat ilinniarsimanermut uppernarsaatinik attuumassuteqartunik, imminut ilisaritinnermik, oqaaseqaatinik attaveqarfissanillu ilalik piffissaliussap qaangiutinginnerani tigoriissavarput.
Imatut qinnuteqassaatit:
Qinnuteqaatit elektroniskimik nassiunneqassaaq, quppernermi matumani allerpaami innersuussaq toorukku qinnuteqaatit, imminut ilisaritinneq il.il. kakkiullugit nassiussinnaavatit.
Malugiuk:
Qinnuteqaatit pappilianngorlugit mailikkulluunniit tiguneq ajorpagut, qinnuteqaatip nittartagaq aqqutigalugu nassiunneqarnissaa inussiarnersumik piumasarineqarpoq.
Pisortaanerup sulisui pillugit
Pisortaanerup sulisui tassaapput Qullersaqarfiup ataani akimortumik suliaqartut. Pisortaanerup sulisuini suleqataasoq ingerlatsinermi suliassanik ineriartortitsinermillu suliassanik illup iluani akimortumik suliaqartarpoq. Suliassat politikkimut - soorluttaaq allaffissornikkut suliassaasinnaapput.
Nittartakkatsinni www.qeqqata.gl/ansat kommunimi sulisut assigiinngitsut pillugit atuarsinnaavatit.
Peqqinnermut pilersaarut pillugu
Qeqqata Kommunia peqqissuunissaq atugarissaarnissarlu pillugit suliniutit tamaasa suliniummi ataatsimi katersornikuuai, tassanngaanniit kommunip peqqissuunissap siuarsarneqarnissaanik suliniutit tamarmik ineriartortinneqarsinnaallutik ataqatigiissaarneqarsinnaallutillu.
Kattussinermik siunertaasoq tassaavoq, kommunimi suliniutit atuutsitsilernissamilu suliaqartarnerup pitsaaliuinermi peqqissuunissallu siuarsarneqarnissaani ukkataqartuusup nukittorsarneqarnissaa ineriartortinneqarnissaalu, immikkoortortat ingerlatsiviillu aamma takorluukkamiit suliniummut atuutsitsilernermullu avataani suleqatigisat akornanni akimortumik suliaqarnissamik suleqatigiinnissamillu pisariaqartumik sinnaakkusiisoq.
Suliniutigisap Suleqatigiinnisami isumaqatigiissummi, kommunip Pilersaarusiornermi periusissiaani, peqqinnissamut pitsaaliuinermullu politikkimi, innarluutilinnut politikkimi, meeqqanut inuusuttunullu politikkimi kiisalu utoqqarnut politikkimi takorluukkanut anguniakkanullu piviusunngortitseqataassaaq.
Qinnuteqarnissamut killissarititaasoq: novembarip 17.-at, 2025